Isang mahalagang hakbang para sa mas berde at mahusay na transportasyon sa Lungsod ng Bacoor ang naganap ngayong araw. Sa pamumuno ni Mayor Strike B. Revilla, katuwang si Cong. Eric Martinez ng Valenzuela City at ang Department of Transportation (DOTr), isinagawa ang Groundbreaking Ceremony para sa konstruksyon ng isang 18.96-kilometrong bike lane. Magkokonekta ang bike lane sa mga pangunahing lugar sa lungsod, naglalayong mapabuti ang imprastraktura para sa mga siklista, maisulong ang malinis na kapaligiran, at mabawasan ang trapiko.
Ginanap ang seremonya sa Roma Cafe, Niog Road, Bacoor Blvd., Bacoor ng 10:00 AM. Nagtipon ang mga opisyal ng gobyerno, mga kinatawan ng lungsod, at mga lokal na stakeholder upang ipakita ang matibay na pangako ng lungsod sa green transportation at urban mobility.
Pinangunahan ang groundbreaking nina Mayor Strike B. Revilla, Vice Mayor Rowena Bautista Mendiola, Cong. Eric Martinez, at mga kinatawan mula sa DOTr sa pangunguna ni Sec. Jaime J. Bautista. Ito ay patunay ng malakas na pagtutulungan ng pambansa at lokal na pamahalaan para sa proyektong ito.
Ang Bacoor Bike Lane Project ay bahagi ng mas malawak na inisyatiba upang maisulong ang aktibong transportasyon sa mga karatig-lungsod ng Metro Manila at mga probinsya. Habang dumarami ang mga gumagamit ng bisikleta bilang alternatibong transportasyon, ang 18.96-kilometrong bike lane na ito, sa tulong ni Cong. Eric Martinez na naglaan ng pondo para isulong ng Pamahalaan ng Bacoor ang proyektong bike lane, ay inaasahang magpapabuti sa kaligtasan ng mga siklista, pagbawas sa paggamit ng mga sasakyan, at gawing mas malinis at luntiang lungsod ang Bacoor.
Ang proyekto ay sasaklaw sa ilang mahalagang ruta sa Bacoor, kabilang ang Daang Radyal Blg. 2 (Zapote Market hanggang Bacoor Blvd.), Daang Radyal Blg. 2 (Niog hanggang Panapaan), Aguinaldo Highway (Salinas hanggang Panapaan), Bacoor-Imus Bypass Road, at Bacoor Blvd. (Bayanan). Ang Pamahalaang Lungsod ng Bacoor, sa pamumuno ni Mayor Strike B. Revilla, ay matagal nang nagsusulong ng mga alternatibong paraan ng transportasyon. Ang proyektong bike lane na ito ay repleksyon ng kanyang pangarap ng isang progresibo at sustainable na lungsod ng Bacoor, kung saan maaaring maglakbay ang mga residente sa ligtas, malusog, at abot-kayang paraan.
Please like and follow our official social media accounts:
Instagram: https://www.instagram.com/citygovtbacoor/
StrikeAsOne Viber Community: https://invite.viber.com/…
STRIKETV Facebook Page
STRIKETV Youtube account
Maraming salamat po.
